Ўзбекистонда миллий қайта суғурта компанияси ташкил этилади

Унинг устав капитали 300 млрд сўмни ташкил этиб, унинг ярми ИЛМA, қолган қисми эса хусусий инвесторларга тегишли бўлади.

23-май куни президент томонидан қабул қилинган қарор билан Ўзбекистонда миллий қайта суғурта ташкилотини ташкил этиш белгиланди.
Ҳужжат билан қайта суғурта тизимини 2025-йилда такомиллаштириш учун бозор ҳажмини 4 трлн сўмга етказиш, хизматлар экспортини камида 30% га, қайта суғурта соҳасига жалб қилинадиган инвестициялар ҳажмини эса 150 млрд сўмгача ошириш белгиланмоқда.

Мамлакатда акциядорлик жамияти шаклида Ўзбекистон қайта суғурта компанияси ташкил қилиниб, компания қонунчилик ҳужжатларида ўрнатилган тартибда қайта суғурта фаолиятини амалга оширади.

Компания хорижий ва маҳаллий инвесторларнинг мамлакат иқтисодиётига киритадиган тўғридан-тўғри ва портфел инвестицияларининг ҳамда инвестиция лойиҳалари бўйича таваккалчиликларнинг комплекс қайта суғурта ҳимоясини таъминлайди.
Шунингдек, унинг фаолият йўналишига хорижий мамлакатларнинг суғурта ва қайта суғурта компаниялари билан ҳамкорлик қилиш ва қайта суғурта операцияларини амалга ошириш киради.

Компаниянинг устав капитали 300 млрд сўмдан кам бўлмаган миқдорда шакллантирилади, унинг 50%ини давлат улуши, қолган қисмини эса хусусий инвесторлар улуши ташкил этади.

Истиқболли лойиҳалар миллий агентлиги (ИЛМА) компаниядаги давлат улуши бўйича акциядор функциясини амалга оширади. Aгентлик ўз маблағлари ҳисобидан компания устав капиталидаги давлат улушининг 5%ини бир ой ичида, қолган қисмини чораклик тенг улушларда бир йил давомида киритиши керак.

Иқтисодиёт ва молия вазирлиги компаниянинг суғурта мажбуриятлари бўйича ҳукумат номидан устав капиталининг шакллантирилмаган қисмига кафил ҳисобланади.

ИЛМA вазирлик билан биргаликда икки ой ичида компания фаолиятини ташкил этиш масалаларига оид ҳукумат қарори лойиҳасини Вазирлар Маҳкамасига киритиши белгиланди.