Search
  1. Бош саҳифа
  2. Янгиликлар
  3. «Ўзбекинвест» ва Савдо-саноат палатаси Ўзбекистон ҳудудларида экспортчиларни қўллаб-қувватлашни кучайтирмоқда

«Ўзбекинвест» ва Савдо-саноат палатаси Ўзбекистон ҳудудларида экспортчиларни қўллаб-қувватлашни кучайтирмоқда

Чоп этиш версияси
25.03.2026

«Ўзбекинвест» компанияси Ўзбекистон Республикаси Савдо-саноат палатаси билан ҳамкорликда мамлакат экспорт салоҳиятини ривожлантириш ва бизнес субъектларининг мавжуд қўллаб-қувватлаш инструментлари бўйича хабардорлигини оширишга қаратилган комплекс чора-тадбирларни изчил амалга оширмоқда.

Жорий йил март ойидан бошлаб ишчи гуруҳ республика ҳудудларида экспортчилар ва тадбиркорлар билан қатор сайёр учрашувлар ўтказмоқда. Бугунги кунга қадар мазкур тадбирлар Наманган, Фарғона, Жиззах, Самарқанд, Сурхондарё, Қашқадарё ва Сирдарё вилоятларини қамраб олди.

Учрашувлар доирасида иштирокчиларга экспорт операцияларини суғурта қилишнинг афзалликлари, шунингдек, ташқи бозорлардаги таваккалчиликларни камайтиришнинг замонавий механизмлари атрофлича тушунтирилмоқда. Айниқса, экспортчиларнинг молиявий барқарорлигини таъминлаш ва уларнинг хорижий бозорлардаги иштирокини кенгайтириш масалаларига алоҳида эътибор қаратилмоқда.

«Ўзбекинвест» компанияси ва Савдо-саноат палатаси мутахассислари тадбиркорларни қизиқтирган барча саволларга батафсил жавоб бериб, очиқ мулоқот шаклида бизнес дуч келаётган долзарб муаммолар ва тўсиқларни муҳокама қилмоқда. Учрашувлар якунида иштирокчиларга экспорт фаолиятини ривожлантириш бўйича аниқ таклиф ва тавсиялар тақдим этилмоқда.

Ишнинг алоҳида йўналиши сифатида маҳаллий экспортчилар эҳтиёжлари ва халқаро бозор талабларини инобатга олган ҳолда ишлаб чиқилган янги суғурта маҳсулотларини тақдим этиш ва жорий қилиш ишлари амалга оширилмоқда.

«Ўзбекинвест» компанияси миллий экспортчилар манфаатларини ҳимоя қилиш тизимини изчил мустаҳкамлаб, уларнинг эҳтиёжларига тезкор жавоб бериш ҳамда самарали молиявий-суғурта механизмларини таклиф этишни давом эттирмоқда.

Жорий йил март ойи якунига қадар тасдиқланган режа-графикка мувофиқ мамлакатнинг бошқа ҳудудларида ҳам шундай учрашувларни ўтказиш режалаштирилган бўлиб, бу тадбирлар янада кенг доирадаги тадбиркорларни қамраб олиш ва уларни долзарб ахборот ҳамда амалий кўмак билан таъминлаш имконини беради.