Search
  1. Бош саҳифа
  2. Янгиликлар
  3. «Ўзбекинвест» ва FALIA суғурта бозорини ривожлантириш ҳамда ҳамкорликни кенгайтириш масалаларини муҳокама қилди

«Ўзбекинвест» ва FALIA суғурта бозорини ривожлантириш ҳамда ҳамкорликни кенгайтириш масалаларини муҳокама қилди

Чоп этиш версияси
12.04.2026

Тошкентда «Ўзбекинвест» ЭИСК АЖ ва Япониянинг дунё бўйлаб ҳаётни суғурталашни ривожлантиришга кўмаклашиш жамғармаси — FALIA ўртасида Ўзбекистон суғурта бозорини ривожлантириш масалаларига бағишланган учрашув бўлиб ўтди.

Жамғарма 1962 йилда Япониянинг етакчи суғурта компанияларидан бири — Dai-ichi Life кўмагида ташкил этилган бўлиб, 2012 йилдан буён ижтимоий фойдали ташкилот мақомига эга. FALIA халқаро таълим дастурларини амалга оширади, тадқиқотлар ўтказади ва суғурта соҳаси мутахассисларини бирлаштиради.

FALIA билан ҳамкорлик доирасида суғурта сектори бўйича 200 дан ортиқ мутахассис, жумладан, «Ўзбекинвест»нинг 65 нафар ходими таҳсил олди.

Учрашув якунлари бўйича томонлар «O‘zbekinvest» ва Ўзбекистоннинг бошқа суғурта компаниялари мутахассислари учун Японияда стажировка ўташ дастурларини кенгайтиришга келишиб олдилар. Ушбу ташаббусдан кўзланган мақсад — ҳаётни суғурталаш, мол-мулк, инвестициялар ва молиявий рисклар соҳасидаги илғор халқаро тажрибани ўрганишдир.