Етиб бориш чизмаси
Ўзбекистон суғурта бозорида юз бераётган ўзгаришлар компаниялардан янги ёндашувларни талаб қилмоқда. Шу мақсадда «Ўзбекинвест» 2025 йил 8–12 сентябрь кунлари ходимлар учун глобал чақириқлар шароитида ишлашга зарур бўлган асосий компетенцияларни шакллантиришга қаратилган интенсив семинар-тренинг ўтказди.
Семинар-тренингни ўтказиш учун халқаро нуфузли экспертлар таклиф этилди: Европанинг етакчи бизнес мактаблари — ESMT Berlin, London Business School ва HHL-Leipzig лекори, этик лидерлик соҳаси бўйича эксперт д-р Франциска Франк ҳамда глобал брокерлик компанияси Marsh вакили Хейко Вабер.
Беш кун давомида иштирокчилар қатор мавзуларни қамраб олдилар. Жумладан, Германиянинг суғурта ва қайта суғуртадаги тажрибаси, корпоратив бошқарувнинг замонавий ёндашувлари, этик лидерлик, расмий ваколатсиз таъсир кўрсатиш усуллари ва босим остида қарор қабул қилиш кўникмалари ўрганилди.
Экспертларнинг таъкидлашича, Ўзбекистон суғурта бозори ҳозирги пайтда шаклланиш босқичида. Бироқ яқин йилларда сунъий интеллектнинг жорий этилиши, халқаро рақобатнинг кучайиши ва меҳнат бозоридаги ўзгаришлар соҳада янги чақириқларни келтириб чиқаради. Шу боис «Ўзбекинвест» менежер ва мутахассисларини ўзгарувчан бизнес муҳитида ишлашга тайёрлаш стратегик аҳамиятга эга омил ҳисобланади.
Ташкил этилган семинар-тренинг компания ходимларига замонавий чақириқларни чуқур англаш имкониятини берди, шунингдек уларга муваффақиятли ечим топиш учун амалий воситаларни тақдим этди. Алоҳида эътибор етакчилик сифатларини ривожлантириш, жамоада самарали ҳамкорлик қилиш ва манфаатдор томонлар билан таъсирчан мулоқот кўникмаларини мустаҳкамлашга қаратилди.
Шу тариқа, «Ўзбекинвест» ташаббуси компаниянинг корпоратив ўқув тизимини барқарор шакллантириш, узоқ муддатли ривожланишга эришиш ва суғурта хизматлари бозорида ўз позицияларини мустаҳкамлаш йўлидаги навбатдаги қадам бўлди.